Aui wo nid as Finale cho si, hei öpis verpasst: E rächt aschpruchsvoui Rundi mitts im schöne Stettli ire familiäre Atmosphäre u fründleche Lüt, vom Speaker mehrmaus aus WM Medallie-Gwinner am Lutsprächer vorgstöut, Start am Seili ohni Drück u e Rennverlouf mit em Dani ir Schpitzegruppe u wo dr Urs und ig di zwöiti Gruppe ir Ändfase hei usenang gno!

Für mi isch das Renne wäge däm vor aune angerne Events wie one-eleven, Berlin oder d’WM das Saison Highlight gsi!

U so isches gange: Nach em Start hets sech gli mau abzeichnet, dass d’Schpitze für mi i dene zauriche Kurve es bitzeli d’schnäu gschtartet isch u i mi besser ir zwöite Gruppe mit em Urs , er Sandra, em Siegethaler Fritz, em Leuebärger Tinu u öpe 15 witere Skater mues stiu ha. Es isch mer de aber glich es bitzeli z’langsam worde u i ha de ir 5. u ir 7. Rundi bi dr chline Stigig am Afang vo dr Rundi agriffe u bi bedi mou sofort ewäg cho! Dr Urs het de es Momänteli gwartet u isch mit emene Zwüschespurt bis zu mir füre ou us dr Gruppe entwüscht! Ir 5. Rundi hets no nid ganz glängt, d’Gruppe het is wieder ighout, aber ir 7. u letschte Rundi heimers gschafft u si zäme is Ziu cho! Bi de Veloprofis macht me das es so……! Auerdings mues i säge, dass dr Urs meh u stercher het chönne füehre aus ig. Ohni ihn wäri nie dürecho!

Obwou ig im Prinzip gäng no e individuau Sportler bi isch doch ab und zue e so nes Teamwork e geili Sach!

D’Sandra isch am Schtart leider gstürzt, isch aber trotzdäm i ihrer Kat. 1. worde u ir SIC- Gsamtwärtig 2. vo aune Froue! I verneige mi!

Itz geits doch no a d’EM, aber nid uf Viareggio sondern uf Kroatie!

Für mi heissts drum no einisch i d’Hose, d’Zäng us s’Schwizerchrüz zeige…!

Paul G. aus G.